ಇಂದು ನನ್ನ ಜನ್ಮ ದಿನ..ಮುಖಪುಟಕ್ಕೆ (ಪೇಸ್ಬುಕ್) ಬರುವುದಕ್ಕಿಂತ ಮುಂಚೆ ನನಗೂ ಒಂದು ಜನ್ಮ ದಿನವಿರುವದೆ ಅರಿವಿರಲಿಲ್ಲ. ಅದು ಇದ್ದರು ಶಾಲಾ ಪ್ರಮಾಣ ಪತ್ರಗಳಲ್ಲಿ ಮಾತ್ರ ಸೀಮಿತವಾಗಿತ್ತು. ಜನ್ಮದಿನದ ಬಗ್ಗೆ ನಮ್ಮನೆಯಲ್ಲಿ ಗೊತ್ತು ಇರಲಿಲ್ಲ. ಅದನೆಂದು ಆಚರಣೆಯು ಮಾಡಿಲ್ಲ. ಆದರೆ ಇಂದು ಎಷ್ಟೋ ಜನ ಸ್ನೇಹಿತರು ಮುಖಪುಟದಲ್ಲಿ. ವಾಟ್ಸಾಪ್ ಗಳಲಿ ನನಗೆ ಜನ್ಮ ದಿನದ ಶುಭಾಶಯಗಳ ಸುರಿಮಳೆ ಗಯ್ಯುತ್ತಿದ್ದಾರೆ. ಕೆಲ ಆತ್ಮೀಯರು ಶುಭ ನುಡಿಗಳೊಂದಿಗೆ ನನ್ನ ಭಾವಚಿತ್ರಗಳನ್ನು ತಮ್ಮ ವಾಟ್ಸಪ್ ಅಂತಸ್ತಿಗೂ ಹಾಕಿ, ಶುಭ ಕೋರುತ್ತಿದ್ದಾರೆ. ಇದು ನೋಡಿ ನನಗೂ ಏನೋ ಒಂಥರಾ ಖುಷಿ, ಏನೋ ಒಂಥರಾ ಸಂತೋಷ, ಅಷ್ಟೇ ಮನಸ್ಸಿಗೆ ಮುಜುಗರ ಕೂಡಾ.
ಜನ್ಮ ರಹಸ್ಯ ತಿಳಿಯಲು ನಾನು ಒಂದು ಸಲ ಅವ್ವನ ಬಳಿ ಹೋಗಿ ಪ್ರಯತ್ನ ಮಾಡಿದೆ... "ಯವ್ವ ನಾ ಯಾವಾಗ ಹುಟ್ಟಿನಿ ಬೆ? ನಾ ಹುಟ್ಟಿದಾಗ ನೀವ್ ಒಂದ ಚಿಟ್ಯಾಗ್ ಬರ್ದದಿಟ್ಟಿಲ್ಲೆನು ಅಂದೆ" ... ಅದಕ್ಕವಳು "ಇವಾಗಿನವರಂಗ ಆಗ ನಾವೆಲ್ಲಿ ಸ್ಯಾಣ್ಯಾರು ಇದ್ದೆವಪ್ಪ... ನಿಮ್ಮಷ್ಟು ಸ್ಯಾಣ್ಯಾತನ ಆಗ ನಮಗೆಲ್ಲಿ ಇತ್ತು",.. ನೀವ್ ಬರದಿಟ್ಟಿದ್ರ ನನ್ನ ಜನ್ಮದಿನ ಆಚರಿಸಲಕ್ಕ ಚಲೋ ಇರ್ತಿತ್ ನೋಡು ಅಂದೆ... |
"ಕಣ್ಣಿದ್ದು ಕುರ್ಡರಪ್ಪ ಆಗ ನಾವು. ಇಗಿನ ಹೆಂಗಸರು ಬಾಳ್ ಸಾಲಿ ಕಲ್ತಿರತಾರ, ಮಕ್ಳ ಹುಟ್ಟಾನ ದಿನಾ, ಟೈಮ್ ತಿಥಿ ನಕ್ಷತ್ರ ಬರ್ದಿಡ್ತಾರ. ವರ್ಷಗೊಮ್ಮಿ ತಿಂಗಳಿಗೊಮ್ಮಿ ಬಡ್ಡ್ಯಾ ಮಾಡ್ತಾರ... ಆಗ ಇದೆಲ್ಲ ನಮಗೆಲ್ಲಿ ಗೊತ್ತಿತ್ತು ಇಂಥ ಆಚರಣಿ. ಬಾಳಾದ್ರ ಅಮಾಸಿ, ಹುಣ್ಣಿಮಿ ಸುತ್ತಾ ಮುತ್ತಾ ಹುಟ್ಟಿದರ್ ತೆಲಿ ಎರ್ಕೊಡು ಗುಡಿಗಿ ಹೋಗಿ ಬರುತ್ತಿದ್ದರು" ಎಂದ್ರು.
"ನಿನ್ನ ಹಡಿದಿವಸ ಚಂತಾನ ಭಾವಿ ಹೊತ್ತ ಸಂಜಿಕಡಿ ಮನಿಗೆ ಬಂದಾಗ ನಮ್ ತವ್ರಮನಿಯವರು ಕುಬಸಾ ಮಾಡಾಕ ಊರಿಂದ ಬಂದಿದ್ದರು, ಅವತ್ತೆ ನನಗ ಬ್ಯಾನಿ ಸರಕಾರ ದವಾಖಾನ್ಯಾಗ ನಿನ್ನ ಹಡದಿನಿ" ಅಂದ್ಳು ನಮ್ಮವ್ವ.
ನಾನು ಕುತುಹಲದಿಂದ " ಹೌದಾ..! ಮತ್ ಕುಬ್ಸಾ ಹ್ಯಾಂಗ್ ಮಾಡಿದ್ರಿ ಬೆ" ಅಂದೆ...
"ಬಂದ ಮಂದಿ ಹಂಗ್ಯಾ ಹೊಗ್ಬಾರದಂತ ನಿಮ್ ಮುತ್ಯಾ ಅವತ್ತ ಎನು ತಿಳಿಲಾರ್ದ ಸಣ್ಣ್ ಹುಡ್ಗಿಗಿ ಅವ್ರ ಅತ್ತಿ ಮಗ್ಳಿಗಿ ನಿಮ್ಮಪ್ಪನ ಜೊತಿ ಕುಂಡ್ರಸಿ ಕುಬಸಾ ಮಾಡ್ಯಾರ". ಅಂದ್ಳು, ಅವ್ಳ ಆ ಮುಗ್ದತೆ ಕಂಡು ನಗು ಬಂತು. ಮತ್ತೆ ಕುತುಹಲದಿಂದ ಕೆಳುತ್ತಾ ನಡೆದೆ....
"ಚೊಛ್ಛಲ ಮಗ ನೀಯೊಬ್ಬ, ಮತ್ತ ಏಳ ತಿಂಗಳಿಗಿ ಹುಟ್ಟದವ ನಿಮ್ ತಮ್ಮೋಬ್ಬ ಯೇನು ತರಾಸ ಮಾಡದೆ ಹುಟ್ಟದವರು ಅಂದ್ರ.. ಒಟ್ಟ್ ಒಂಬತ್ತ್ ಮಕ್ಳನ ಹಡದಿನಿ, ಒಂದು ಬದುಕಲಿಲ್ಲ. ಅವೆಲ್ಲ ಹೊಟ್ಟ್ಯಾಗ ಸತ್ತ ಹುಟ್ಟತಿದ್ವು, ದವಾಖಾನ್ಯಾಗ ಸಿಕ್ಕಂಗ ಹೊಟ್ಟಿ ಹಿಚಕ್ಯಾಡಿ ಅವು ತಗದಾರ" ಅಂದಾಗ ಮನಸಿಗೆ ಏನೋ ಒಂಥರಾ ಕಸಿವಿಸಿ ಯಾಗಿ ಕಣ್ಣಲ್ಲಿ ನೀರ ಬಂತು ಅದರು ತೊರಗೊಡದೆ.
ಮತ್ತೆ ನಕ್ಕೋತಾ "ಇರಲಿ ಬಿಡು ಬೆ... ಇಗಿನವರು ಅಗಿದ್ದರ ಸತ್ತೆ ಹೊಗ್ತಿದ್ದರು ನಿಮ್ಮದು ಗಟ್ಟಿ ಜೀವ್ ಅದ್ಕ ಬದುಕಿರಿ".. ಅಂದೆ
"ಮಗ ನೀ ಹುಟ್ಟಿದಾಗ ದೀವಳ್ಗಿ ಅಮಾಸಿ ಸಮೀಪ ಇತ್ತು. ಆಗ ಗಟ್ಟಿಗಿತ್ತಿ ಇಂದ್ರವ್ವ ದೇಶಾ ಆಳ್ತಿದಳು. ನಮ್ಮೂರ ಕುಲಕಾಣ್ಯಾರ ಮಗಾನು ಅವತ್ತೆ ಹುಟ್ಟ್ಯಾನ ಅವ್ರೆನರ ಬರ್ದಿಟ್ಟಿರ ಬೇಕು ಅವರ್ನ ಕೆಳಿದರ ಗೊತ್ತಾಗತಾದ" ಅಂದ್ಳು.
ಅಮಾವಾಸಿ, ಹುಣ್ಣಿಮಿ ಲೆಕ್ಕ ಹಾಕಿ ದಿನಗಳ ಅಳೆಯೊ ಕಾಲದಾಗ ಹುಟ್ಟಿದವ ನಾನು ಪಾಪ ಅವ್ರರೆ ಎಲ್ಲಿಂದ ಬರ್ದಿಟ್ಟಾರು ನನ್ನ ಜನ್ಮ ದಿನವನ್ನ. ಶಾಲಾ ಹೆಡ್ ಮಾಸ್ಟರ್ ಕೃಪೆಯಿಂದ ನನಗೂ ಒಂದು ಜನ್ಮದಿನ ಸಿಕ್ತು ಇಂಗ್ಲಿಷ್ ಕ್ಯಾಲೆಂಡರ ಪ್ರಕಾರ ಹಾಗೂ ಶಾಲಾ ದಾಖಜಲಾತಿ ಪ್ರಕಾರ ಇಂದು ನನ್ನ ಜನ್ಮದಿನ ನವಂಬರ್ ತಿಂಗಳಲ್ಲಿ ಆಚರಿಸಿಕೊಳ್ಳುತ್ತಿದ್ದೇನೆ. ಅವ್ವ ಹೇಳುವ ಪ್ರಕಾರ ದಿವಳಗಿ ಸುತ್ತಾಮುತ್ತಾ ಅಂದರೆ. ನವೆಂಬರ್ ಡಿಸೆಂಬರ್ ತಿಂಗಳು ಆಗಿರಬಹುದು.
ಕೈ ತಿರುವಿ ಜೊಗ್ಗಿ ಹಚ್ಚಿದದ್ರು ಕಿವಿಗೆ ಬಾರದ ವಯಸ್ಸಿನ್ಯಾಗ ನಮ್ಮ ಚಿಕ್ಕಪ್ಪ(ಕಾಕಾ)ರ ಜೊತಿ ನನಗೂ ಶಾಲೆಗೆ ಹೆಸರ ನಮ್ಮ ಮುತ್ಯಾ ಹಚ್ಚಿ ಬಂದಿದ್ದ ಅನಿಸುತ್ತೆ. ಆದರೆ ನನಗೆ ತಿಳುವಳಿಕೆ ಬಂದು ನಮ್ಮ ಚಿಕ್ಕಪ್ಪರ ಜೊತೆ ಶಾಲೆಗೆ ಹೊಗಿ ಕ್ಲಾಸಿನ್ಯಾಗ ಕುಂತಾಗ ನಮ್ಮ ಸರ್ ಒಬ್ಬರು ಹೆಸರು ಕೂಗಿದಾಗಲೇ ಗೊತ್ತಾಗಿದ್ದು, ಈಗ ನಾನು ನಾಲ್ಕನೇ ತರಗತಿಗೆ ಬಂದಿದ್ದಿನಿ ಅಂತ.
ಅವರೇ ನಾನಗೊಂದು ಜನ್ಮದಿನವನ್ನ ನೀಡಿದ್ದರು. ಅದುವೆ ಮುಂದೆ ಎಲ್ಲಾ ಪ್ರಮಾಣ ಪತ್ರಗಳಲ್ಲಿ ನಮೂದಾಯಿತು. ಅದೇ ನನ್ನ ಜನ್ಮ ದಿನವಾಗಿ ಇಂದು ಆಚರಣೆಯು ನಡೆಯಿತು... ನನ್ನ ಮಡದಿ ಪ್ರತಿ ವರ್ಷ ಈ ದಿನದಂದು ನನಗಾಗಿ ಉಡುಗೊರೆಯು ಸಹ ಕೊಡಿಸ ತೊಡಗಿದಳು. ಆತ್ಮೀಯ ಸ್ನೇಹಿತರು ಪಾರ್ಟಿ ಅದು ಇದು ಅಂತ ಖರ್ಚು ಮಾಡಿಸಿದ್ದು ಆಗಿದೆ. ನಾನು ಕೂಡ ಹರಿಸಿ ಹಾರೈಸಿದವರಿಗೆ ಧನ್ಯವಾದಗಳು ತಿಳಿಸಿ ಖುಷಿ ಪಡ್ತಾ ಇದ್ದೀನಿ.
◼ ಶ್ರೀ ಬಸವರಾಜ ಭೂತಿ, ಹಿಂದಿ ಭಾಷಾ ಶಿಕ್ಷಕರು ಹಾಗೂ ಸಂಪನ್ಮೂಲ ವ್ಯಕ್ತಿಗಳು